中一篇 (二) 唔知點解，讀中一已經有一個特別鍚我既中六姐姐，佢鍚我既程度會去到…每朝會係樓下等埋我一齊行番學校， Recess會買定支熱維奶係Cover等我，Lunch會出去買壽司比我食，會帶定個蘋果比我做飯後果， 加埋盒Pocky百力滋俾我做下午茶，放學會陪我打籃球或者去游水，唔玩就留係Cover做功課， 有唔識就幫我補習，五六點就一齊行番屋企，全日節目都仲未完喎，食完飯我地仲會傾好耐電話， 直到十一點零我比人鬧先至收線，第二朝既早上，佢又會係樓下等我，開始新一個循環！ 我就係咁日日都跟住呢個中六姐姐，佢要早返學我又跟，佢放學要遲走我又跟。記得有一日， 中六姐姐話要早d番學校交學生會櫃條鎖匙比人，所以要早少少番去，以我當時既性格就梗係照跟架啦！ 番到學校，唔知係我地早到定係果個人遲到啦，總之就唔見收匙人既蹤影，等左一陣…哦！ 原來係佢！呢個人我見過啦，成鬼日同班女仔係Cover傾計果個呀嘛，近睇，咪又係普通人一個！ 唔記得呢個人有冇撩我傾計lu，總之，我就冇諗過show佢啦，佢先得個Form 3！