第二十篇-情書
Dearest 靜怡,
真係話都冇咁快, 如果冇同你分開既話, 原來唔經唔覺已經黎到第八個年頭. 同你既分手,
令到我成長左好多好多, O係人同人相處方面, 自問真係成長左好多, 呢個, 係真係你既功勞. 多謝你!
同你一齊既時候, 我心目中既你, 係一個細路女, 一個好多野都唔識, 好多野都要我教, 成日發小姐脾氣,
唔講纙緝, 唔講道理既女朋友. 分開左之後既呢幾年, 人漸漸長大, 諗番以前, 原來唔成熟既, 反而係自己.
原來我心目中既靜怡仔, 並唔係一直我諗既咁樣. 如果要我寫一篇文章去描述你既話, 我會咁寫:
~ ~ ~ ~ ~ ~ ~ ~ ~ ~ ~ ~ ~
佢係一個好識得大體, 好有家教既女仔. 我同佢會嗌交, 但係佢會識得睇地方, 睇時間. 即係當,
如果我同佢O係星期一嗌交, 而星期五係一個重要既日子, SAY佢生日, OR什麼周年紀念, 佢就會知道呢場交,
一定要O係星期四之前和好, 如果唔係, 就會錯過一個重要既日子. 又如果O係同我屋企去街之前嗌交,
呢場交就一定會O係之前嗌完, 因為, 佢知道, 我地既拗撬只係我地兩個之間既事, 冇必要要令其他人一齊唔開心.
但係又咁喎, 當同其他人出完去之後, 佢又會識得講番件事, 因為佢唔願意將一件小事積埋積埋,
第二日會好似滾雪球咁, 變成左分手既原因. 所以每次既嗌交, 佢都要一個圓滿既解決方法.
佢又係一個好識做既女朋友, 佢永遠唔會O係我既屋企人, 朋友面前發脾氣, 就算當時我有咩做得唔O岩,
佢都會O係得番兩個人既時候先同我算賬.
佢好理性, 我地兩個如果其中一個有病既話, 佢一定唔會俾我地有咩親密既行為,
佢會适: "好玩咩? 陣間攪到你(我)都病埋, 咁邊個照顧對方?"
我成日都好鍾意同佢講道理, 每次嗌交, 我都會一大堆既道理, 佢成日都講: "我邊你拗呀, 最佳辯論員!"
佢唔夠我拗既原因, 只係因為佢當時未有咁快去回應我, 或都講野唔夠我叻, 但係而家諗番起,
其實, 佢從來都唔會同我嗌一場冇理由既交.
係, 當然有時, 佢會講佢嬲只係因為佢想我"TUM"下佢, 但係呢D情況, 佢又會知道自己唔O岩既喎, 佢又會同我認錯.
佢係一個好典型要男朋友鍚要男朋友陪既女仔. 但係, 當我想做我既野既時候, 回想起, 佢從未阻過.
最後想講既係, 佢係一個好識得照顧人感受既人. 知唔知咩叫無痛分手? 由於佢既安排, 分手既痛,
只係因為分手. 我唔會因為要諗起俾番D乜野佢, 又或者拿番D乜野, 而要再痛多一次.
以前, 我唔覺得係件咩事, 但係, 佢真係一個連分手都會焄顧你感受既人
~ ~ ~ ~ ~ ~ ~ ~ ~ ~ ~ ~ ~
好想讚你, 因為從來未咁樣讚過你, 而呢D野, 係同你分開左之後回想起先至發現.
Long Memories 入面有好多野, 我冇提過, SWIMMING GALA O個件紅色既外套, 我同你去過既地方,
O係上環維德廣場外面既O個一刻, 我從來都冇忘記過. 一大堆既片段, 好零碎, 每一個片段都好深刻,
但係, 當要砌成一個完整既圖畫既時候, 原來係有一定既難度既.
經常拉開櫃筒, 都會睇番你以前俾我既信, 由笑睇到喊, 由喊睇到笑, 訧算過左咁多年, 睇左咁多次,
每一次, 都總係有感覺. 好後悔當時冇跟番次序收起, 令到我今日, 唔可以將我地呢個故事好完整咁去重組.
呢個網頁, 唔知你會唔會有一日睇到, 但係咁, 我真係唔需要得到你既感動, 何況一我亦都唔覺得有D咩要去感動.
講過好多次, 我只係做一D我想做既野.
每個人心入面都會分開一格格, 例如會有一格係好朋友, 一格係兄弟, 又會有屋企人, 情人, 舊情人, 泛泛之交等等.
我同你講呀, 就算以後, 我遇到一個我愛既女朋友, 或者老婆, 佢地既位置唔會高過你, 或者低過你.
因為, 你O係我心入面唔係屬於任何一格. 我既心入面, 係有一格叫做靜怡.
呢幾個月, 你無啦啦既O係我生命入面出現番, 真係曾經令迥我存有幻想, 當呢D幻想慢幻滅既時候, 我竟然再次既覺得痛.
過左咁多年, 曾經好想做好多既野去再次令你返番我既身邊, 但係今日開始, 係, 係今日,
今日真係好舒服, 今日見到你, 我冇再刻意既去做任何既野去討好你, 亦都冇再專登唔去做任何你唔鍾意既野.
以前成日都以為自己好愛你, 其實原來愛一個人, 可以有另一種方式.
我知道, 我地最多只可以做到朋友, 而我, 亦都好希望可以咁樣. 呢份回憶, 我諗, 只要O係我腦入面,
就已經好夠. 至於你點諗, 我亦唔想再去在意.
原來, 愛一個人, 真係可以想佢幸福, 而自己係唔會唔開心既. 係你令我明白到呢點, 多謝你!
我愛你!
LONG
2002年3月22日