第十八篇-醒覺 O個一日, 係1998年12月其中一日, 陽光普照, 但有D凍, 要上早堂既關係, 所以一早就揹起我個靚靚書包走門口. 往常既步伐, 往常既心情返學校. 出地鐵站, 經過又一城, 穿過隧道. 將近行到紅門既時候, 有陣風吹過, 唔知點解, O係個陣風吹黎既時候, 我個腦竟然不斷既諗起靜怡. O個一刻, 我同自己講, "你執到啦, 有個咁既女朋友, O係你自己咁貪玩, 咁自私既時候, 都仲仍然肯跟住你, 如果你再唔懂得對佢好D, 到時佢離開你既時候, 就呢都無謂. O拿!今日起, 就要做番一個稱職既男朋友, 唔可以再令佢失望, 唔可以再令佢唔開心!" 同自己許下左一個諾言之後, 全日我都O係度諗, 我今晚開始要點做. O個晚對我黎講係一個好特別既夜晚. 我同佢, 足足有三個星期冇見面, 雖然我地兩個之間可能已經再冇乜初戀既火花, 但係, 我真係好掛住佢 - 幾日之前, 我約左佢上我食飯之後, 就已經有呢種感覺, 可能就係"愛"掛... 佢夜晚放學之後, 就上左我屋企, 由於好耐冇上黎食飯既關係, 媽咪特別煮左好多佢鍾意食既(食送). O個晚食飯, 我對佢, 可能係咁多個月以黎最好既一日. 當時, 我亦同自己講, 以後都要咁對佢.